ఊరంతా వెలుగుల పండగొచ్చెరో
దీపావళి పాట
రచన : రామకృష్ణ దువ్వు
పల్లవి:
ఊరంతా వెలుగుల
పండగొచ్చెరో...
ప్రతి ఇంట సంబరాలు
వెల్లువచ్చెరో!
దివ్వెల కాంతుల
సంకేతాలందుకొని
దివిలోని దేవతలు
దీవెనలు కురిపించగా
అందరి మనసుల
మెరిసే స్నేహావళి!
చిన్నారుల నవ్వుల
ముత్యాలావళి…
దీపావళి... ఇది దీపావళి...
దీపావళి... ఇది దీపావళి...
చరణం 1:
తొలి పొద్దున ముంగిట్లో
స్వాగతించె రంగవల్లులు
పిండివంటల సువాసనలతో
ఇల్లంతా ఘుమఘుమలు
రంగురంగుల బట్టలతో ముస్తాబై
అందుకొనగ పెద్దల దీవెనలు
మామిడి తోరణాల
ముంగిట నిలచే...
చిరునవ్వుల తారకలు
పలకరించి పాడే..
దీపావళి... ఇది దీపావళి...
దీపావళి... ఇది దీపావళి...
చరణం 2:
చీకటిని తరిమి కొడుతూ
ఊరంతా దీపాల వెలుగులు...
మతాబుల చినుకుల
మైమరపులతో
నింగికెగిరే తారాజువ్వలు …
కాకరపూవత్తుల కాంతులతో
పాపాయి కళ్లల్లో కేరింతలు
అష్టలక్ష్మీ దేవిని
శ్రద్దగా పూజించ
ప్రతి ఇంట వర్షించే
భాగ్యామృతం…
దీపావళి... ఇది దీపావళి...
దీపావళి... ఇది దీపావళి...
- రామకృష్ణ దువ్వు
కామెంట్‌లు లేవు:
కామెంట్‌ను పోస్ట్ చేయండి